بینظیر بھٹو ٹراما انسٹی ٹیوٹ میں 10 سال کے دوران سڑک حادثات کے 3 لاکھ 28 ہزار سے زائد کیسز رپورٹ

کراچی: شہید محترمہ بینظیر بھٹو انسٹی ٹیوٹ آف ٹراما کے ماہرین نے انکشاف کیا ہے کہ ادارے میں گزشتہ 10 برس کے دوران سڑک حادثات میں زخمی ہونے والے افراد کے 3 لاکھ 28 ہزار 841 کیسز رپورٹ ہوئے، جبکہ 5 ہزار 45 افراد کو مردہ حالت میں اسپتال لایا گیا۔ ماہرین نے حادثات کی روک تھام، فوری طبی امداد اور عوام میں ٹریفک قوانین سے متعلق شعور اجاگر کرنے کی ضرورت پر زور دیا ہے۔

ڈاؤ یونیورسٹی آف ہیلتھ سائنسز میں ہفتے کے روز منعقدہ تقریب میں ٹراما آگاہی ہفتہ 2026 اور عالمی یومِ ٹراما کے سلسلے میں ہونے والی سرگرمیوں کا اختتام کیا گیا۔ تقریب میں زخمیوں کی روک تھام، انسانی جانوں کے تحفظ، ٹراما کیئر میں طبی ترقی اور ایس ایم بی بی انسٹی ٹیوٹ آف ٹراما کی دس سالہ خدمات اور کامیابیوں کو اجاگر کیا گیا۔

مقررین نے کہا کہ حادثات کے شکار افراد کی جان بچانے کے لیے بروقت طبی امداد بنیادی اہمیت رکھتی ہے، تاہم حادثات کو وقوع پذیر ہونے سے پہلے روکنا بھی اتنا ہی ضروری ہے۔ انہوں نے ٹریفک قوانین پر عمل درآمد، تیز رفتاری سے گریز، ڈرائیونگ کے دوران موبائل فون استعمال نہ کرنے، موٹر سائیکل سواروں کے لیے ہیلمٹ اور گاڑیوں میں سیٹ بیلٹ کے استعمال کو محفوظ سفر کے لیے ناگزیر قرار دیا۔

ایس ایم بی بی انسٹی ٹیوٹ آف ٹراما کے سربراہ ڈاکٹر محمد صابر میمن نے بتایا کہ ٹراما کیئر کا انحصار صرف جدید طبی سہولتوں پر نہیں بلکہ فوری ایمرجنسی رسپانس، تربیت یافتہ طبی عملے، مربوط ٹیم ورک، مؤثر انتظامی نظام اور مریضوں کو بروقت طبی امداد فراہم کرنے پر بھی ہوتا ہے۔ ان کے مطابق ادارے نے 2016 سے اپنی ایمرجنسی خدمات اور مریضوں کی دیکھ بھال میں بہتری کے لیے مسلسل کام کیا ہے۔

انہوں نے بتایا کہ گزشتہ دس برس کے دوران انسٹی ٹیوٹ کے ایمرجنسی ڈیپارٹمنٹ میں مریضوں کی آمد کے مجموعی طور پر 14 لاکھ 48 ہزار 624 کیسز ریکارڈ کیے گئے۔ ان میں سے 3 لاکھ 28 ہزار 841 کیسز سڑک ٹریفک حادثات سے متعلق تھے۔ اسی عرصے میں 5 ہزار 45 افراد کو مردہ حالت میں اسپتال لایا گیا، جبکہ آتشیں اسلحے سے زخمی ہونے کے 9 ہزار 634 کیسز بھی رپورٹ ہوئے۔

ڈاکٹر محمد صابر میمن نے کہا کہ یہ اعداد و شمار حادثات، تشدد اور دیگر سنگین چوٹوں کے انسانی زندگی پر تباہ کن اثرات کو ظاہر کرتے ہیں اور اس امر کی اہمیت اجاگر کرتے ہیں کہ ہنگامی حالات میں مریضوں کو بروقت طبی امداد فراہم کی جائے۔

تقریب کے شرکاء نے اس بات پر زور دیا کہ سڑک حادثات کی روک تھام کے لیے حکومت، طبی اداروں، ٹریفک پولیس، ریسکیو سروسز، تعلیمی اداروں، میڈیا اور عوام کو مشترکہ طور پر اپنا کردار ادا کرنا ہوگا۔ مقررین کے مطابق آگاہی مہمات کے ذریعے ٹریفک قوانین کی پابندی اور محفوظ ڈرائیونگ کو فروغ دے کر حادثات کے نتیجے میں ہونے والی قابلِ تدارک اموات اور معذوریوں میں کمی لائی جاسکتی ہے۔

اس موقع پر سرکاری اداروں اور طبی ماہرین کے درمیان تعاون بڑھانے، ایمرجنسی رسپانس نظام کو مضبوط بنانے اور طبی عملے کی پیشہ ورانہ تربیت کو جدید تقاضوں سے ہم آہنگ کرنے کی ضرورت پر بھی روشنی ڈالی گئی۔

تقریب کے دوران ڈاکٹر دویہ کیولرامانی نے مصنوعی ذہانت (اے آئی) کے ٹراما سرجری میں استعمال کے موضوع پر آن لائن سیشن پیش کیا، جس میں ٹراما سرجری میں مصنوعی ذہانت اور جدید ٹیکنالوجی کے ممکنہ کردار پر گفتگو کی گئی۔