کراچی: سندھ کے سینئر وزیر شرجیل انعام میمن نے جمعے کو داؤد یونیورسٹی آف انجینئرنگ اینڈ ٹیکنالوجی (ڈی یو ای ٹی) کے اقبال کیمپس میں جدید اسپورٹس کمپلیکس اور طلبہ کے لیے نئے ہاسٹل کا افتتاح کردیا۔
تقریب سے خطاب کرتے ہوئے شرجیل انعام میمن نے کہا کہ مستقبل کے انجینئرز کو محنت، لگن اور پیشہ ورانہ مہارت کے ذریعے قومی اور بین الاقوامی سطح پر اپنی صلاحیتوں کا لوہا منوانا ہوگا۔
انہوں نے نوجوانوں پر زور دیا کہ وہ سرکاری ملازمتوں پر انحصار کرنے کے بجائے اپنی صلاحیتوں کو بروئے کار لاتے ہوئے روزگار کے نئے مواقع پیدا کریں اور کاروباری سرگرمیوں کو فروغ دیں۔
سینئر وزیر نے کہا کہ انفارمیشن ٹیکنالوجی، پیٹرولیم اور دیگر اہم شعبوں میں مہارت رکھنے والے نوجوان انجینئرز ملک کا نام روشن کرسکتے ہیں۔ معیاری تعلیم حاصل کرنے کے بعد طلبہ کو اپنا مستقبل سنوارنے کی ذمہ داری خود اٹھانی چاہیے، کیونکہ ملک کے اندر اور بیرونِ ملک مواقع کے حصول کے لیے پیشہ ورانہ قابلیت اور مخصوص شعبوں میں مہارت کی اہمیت بڑھ رہی ہے۔
انہوں نے یونیورسٹی انتظامیہ کی جانب سے طلبہ کو فراہم کی جانے والی سہولتوں کو سراہتے ہوئے کہا کہ تعلیمی ادارے طلبہ کو سازگار ماحول اور بہتر سہولتیں فراہم کرنے میں اہم کردار ادا کرتے ہیں۔
اس موقع پر رکن سندھ اسمبلی قاسم سراج سومرو اور سندھ حکومت کے ترجمان گھنور خان اسرن نے بھی خطاب کیا۔
قبل ازیں، داؤد یونیورسٹی کی وائس چانسلر ڈاکٹر سمرین حسین نے مہمانوں کا استقبال کیا اور انہیں اسپورٹس کمپلیکس کا دورہ کرایا، جہاں انہوں نے مختلف کھیلوں کے لیے دستیاب سہولتوں کے بارے میں بریفنگ دی۔
نئے اسپورٹس کمپلیکس میں کرکٹ، فٹسال، باسکٹ بال، ٹینس، بیڈمنٹن اور والی بال سمیت انڈور اور آؤٹ ڈور کھیلوں کی سہولتیں فراہم کی گئی ہیں، جبکہ نئے ہاسٹل میں طلبہ کی رہائش کی ضروریات پوری کرنے کے لیے انتظامات کیے گئے ہیں۔